نئی دہلی، یکم نومبر : ممتاز شیعہ عالمِ دین و رہنما مولانا حسن علی راجانی نے گجرات کے تاریخی شہر بھروچ کی جامع مسجد سے متعلق جاری تنازع پر تشویش کا اظہار کرتے ہوئے کہا ہے کہ کسی بھی مذہبی عبادت گاہ کی شناخت اور تاریخی حیثیت کا فیصلہ جذبات، سیاسی دباؤ یا یک طرفہ دعووں کی بنیاد پر نہیں ہونا چاہیے۔انہوں نے کہا کہ اگر کسی فریق کو کسی مذہبی مقام کی تاریخ کے حوالے سے اعتراض ہے تو اسے مستند تاریخی دستاویزات، آثارِ قدیمہ کے شواہد اور قانونی طریقۂ کار کے ذریعے ثابت کیا جانا چاہیے۔مولانا راجانی نے کہا کہ صدیوں سے قائم مذہبی مقامات کے معاملات میں امن، مذہبی ہم آہنگی اور شہریوں کے آئینی حقوق کو اولین ترجیح دی جانی چاہیے۔ کسی بھی عبادت گاہ کو تنازع کا سیاسی ذریعہ بنانا معاشرتی اعتماد کو نقصان پہنچا سکتا ہے۔انہوں نے مرکزی حکومت، گجرات حکومت، محکمہ آثارِ قدیمہ اور عدلیہ سے اپیل کی کہ بھروچ جامع مسجد کے معاملے میں تاریخی شواہد کی غیر جانب دارانہ جانچ، مسجد انتظامیہ کا مؤقف سننے اور تمام فریقوں کے قانونی حقوق کے تحفظ کو یقینی بنایا جائے۔مولانا حسن علی راجانی نے مزید کہا کہ ہندوستان کی خوبصورتی اس کی مذہبی گوناگونی، آئینی اقدار اور باہمی احترام میں ہے۔ ملک میں ہر مذہب کے ماننے والوں کو اپنے عقیدے اور عبادت گاہوں کے تحفظ کا یکساں حق حاصل ہونا چاہیے۔انہوں نے واضح کیا کہ انصاف، امن اور قانون کی بالادستی ہی ایسے حساس مذہبی تنازعات کا پائیدار حل ہے۔