سرینگر/نئی دہلی، 5 نومبر: معروف شیعہ عالم دین اور رہنما مولانا حسن علی راجانی نے آغا سید روح اللہ مہدی کے سیاسی رویے پر تنقید کرتے ہوئے کہا کہ جموں و کشمیر کا وزیر اعلیٰ بننے کا خواب ان کے ذہن میں اتنا پختہ ہو گیا تھا کہ وہ مستقبل میں اویسی جیسے بی جے پی کے حمایتی لیڈروں کے ساتھ وزیر اعظم بننے کا خواب دیکھنا چاہتے تھے۔ مولانا حسن علی راجانی نے کہا کہ جموں و کشمیر کی سیاست میں ذاتی سیاسی خواہشات کے بجائے عوامی ترقی، امن، روزگار، تعلیم اور ریاست کے مستقبل کو ترجیح دی جانی چاہیے۔ سیاست کا مقصد اقتدار حاصل کرنا نہیں بلکہ عوام کی خدمت ہونا چاہیے۔ وزیر اعلیٰ عمر عبداللہ کے سیاسی کردار کا ذکر کرتے ہوئے انہوں نے کہا کہ عمر عبداللہ اور فاروق عبداللہ کا خاندان جموں و کشمیر کی سیاست سے طویل عرصے سے وابستہ ہے اور وہ خطے کی ترقی اور خوشحالی کے لیے اپنا سیاسی کردار ادا کر رہے ہیں۔ عمر عبداللہ کی قیادت میں جموں و کشمیر کی بہتری کے لیے کی گئی کوششوں کو سیاسی تناظر میں دیکھا جانا چاہیے۔ مولانا راجانی کا مزید کہنا تھا کہ سیاسی اختلافات جمہوریت کا حصہ ہیں، لیکن اختلافات کی آڑ میں لوگوں کو تقسیم کرنا یا کشیدہ سیاسی ماحول پیدا کرنا کسی کے مفاد میں نہیں ہے۔ جموں و کشمیر کو ایسے سیاسی لیڈروں کی ضرورت ہے جو عوام کے مستقبل اور ترقی کو اپنی ترجیح بنائیں۔